10 Hydref 2025

Dyma’r garreg filltir ddiweddaraf yn ymdrechion parhaus Cymru Fyd-eang i gefnogi partneriaeth rhwng Karnataka a sefydliadau addysg uwch ac addysg bellach yng Nghymru. Mae llwyddiant y mentrau cydweithredol hyn wedi'i wella'n fawr yn sgil yr ymgysylltiad cynnes a'r partneriaethau cryf â rhanddeiliaid y wladwriaeth ac addysg yn y rhanbarth.

Bydd y gronfa’n galluogi sefydliadau yng Nghymru i ddechrau datblygu perthnasoedd cynaliadwy, hirdymor gyda sefydliadau Karnataka, cryfhau cysylltiadau academaidd, cefnogi ymchwil ar y cyd, a hwyluso cyfnewid gwybodaeth ar draws ffiniau.

Bydd Cymru Fyd-eang yn sefydlu cronfa arloesedd o £36,000 i gefnogi prosiectau partneriaeth Cymru-Karnataka, gyda phob un o'r wyth prifysgol sy'n cymryd rhan yn Karnataka yn cyfrannu swm cyfatebol o £4,500, gan ddod â chyfanswm y buddsoddiad cydweithredol i £72,000.

Gall sefydliadau yng Nghymru wneud cais am gyllid o £4,500 ar gyfer pob prosiect, y gellir ei ddefnyddio mewn amrywiaeth o ffyrdd gan gynnwys paratoi ar gyfer ymchwil, cefnogi meithrin capasiti/hyfforddiant, addysg drawswladol, a chyflwyno gweithdai. Mae meysydd blaenoriaeth yn cynnwys: trawsnewid digidol; sero net, ynni gwyrdd a datgarboneiddio; technoleg amaethyddol a'r economi wledig; diwydiannau creadigol a'r cyfryngau; iechyd y boblogaeth a biodechnoleg; a deunyddiau a gweithgynhyrchu (gan gynnwys lled-ddargludyddion).

Mae'r cyhoeddiad cyllido hwn yn dilyn dirprwyaeth ddiweddar o arweinwyr prifysgolion o Karnataka dan arweiniad y Cyngor Prydeinig, ynghyd ag Is-gadeirydd Cyngor Addysg Uwch Talaith Karnataka, i Gymru am ymweliad tridiau, â’r nod ffurfio cysylltiadau â phrifysgolion Cymru ac archwilio cyfleoedd newydd ar gyfer cydweithio, arloesi a phartneriaethau byd-eang.

Roedd yr ymweliad yn cynnwys cyfarfod bwrdd-crwn rhwng Cymru ac India yn canolbwyntio ar flaenoriaethau addysg uwch ar gyfer y ddwy wlad, a fynychwyd gan Gyngor Prydeinig Cymru, Llywodraeth Cymru, Medr, Prifysgolion Cymru a chynrychiolwyr o brifysgolion yng Nghymru. Ymwelodd y ddirprwyaeth â nifer o sefydliadau Cymru, gan nodi cam arall ymlaen wrth gryfhau'r cysylltiadau rhwng sectorau addysg uwch y ddwy wlad.

Meddai Ysgrifennydd y Cabinet dros Addysg, Lynne Neagle ASC:

"Rwyf wrth fy modd yn gweld y cyllid newydd hwn yn cefnogi'r bartneriaeth rhwng prifysgolion yng Nghymru a Karnataka. Bydd y trefniadau cydweithredol hyn yn creu cyfleoedd go iawn i'n myfyrwyr a'n hymchwilwyr gydweithio ar yr heriau sydd bwysicaf i'n dwy wlad. Mae'n hyfryd gweld sut mae'r perthnasoedd hyn yn parhau i dyfu ac o fudd i bawb sy'n gysylltiedig â’r fenter."

Dywedodd Dr MC Sudhakar, Gweinidog Anrhydeddus Addysg Uwch, Llywodraeth Karnataka:

 

"Rydym yn croesawu'r trefniant cydweithredol hwn gyda rhaglen Cymru Fyd-eang, a fydd yn gwella capasiti prifysgolion Karnataka ac yn galluogi ein myfyrwyr a'n hacademyddion i ymgysylltu'n fyd-eang." Mae'r cytundeb mewn egwyddor i ariannu wyth partneriaeth wedi'i anelu at gryfhau cysylltiadau rhwng sefydliadau addysg Cymru a Karnataka. Mae gennym berthynas â'r Cyngor Prydeinig ers blynyddoedd lawer, ac rydym yn hyderus y byddwn gyda'n gilydd yn helpu ein sefydliadau i gryfhau cysylltiadau academaidd ac ymchwil, gan gyfrannu at dwf Karnataka fel canolfan ar gyfer addysg uwch o safon."

Meddai Dr Ben Calvert, Cadeirydd Cymru Fyd-eang:

“Mae’n wych gweld ymgysylltiad Cymru Fyd-eang â thalaith Karnataka yn parhau i ffynnu ar ôl blynyddoedd o bartneriaeth a chydweithio. Bydd creu’r gronfa hon i gefnogi cydweithio pellach rhwng prifysgolion yng Nghymru a Karnataka yn annog perthnasoedd cadarn a hirhoedlog rhwng sefydliadau, gan ddatblygu partneriaethau ymchwil sy’n mynd i fod o fudd i Gymru a Karnataka.”

Dywedodd Janaka Pushpanathan, Cyfarwyddwr y Cyngor Prydeinig, De India:

"Mae'r bartneriaeth rhwng Cymru Fyd-eang a sefydliadau yn Karnataka yn nodi cam pwysig wrth gryfhau cydweithio yn y sector addysg uwch rhwng India a'r DU. Drwy’r wyth partneriaeth newydd hyn, rydym yn meithrin cyfnewid gwybodaeth, ymchwil ar y cyd, a rhyngwladoli sy’n mynd i fod o fudd i fyfyrwyr, academyddion, a chymunedau yn y naill ranbarth a’r llall. Mae'r Cyngor Prydeinig yn falch o gefnogi'r bartneriaeth hon a gweledigaeth Karnataka ar gyfer ymgysylltiad byd-eang mewn addysg uwch.

Am ragor o wybodaeth cysylltwch â Tom Woodward