16 Mehefin 2025

Mae gwerthusiad annibynnol o Astudio yng Nghymru – a gyflwynir trwy raglen Cymru Fyd-eang – yn dangos bod buddsoddiad wedi’i dargedu yn cyflawni canlyniadau pendant i sector addysg ryngwladol Cymru.

Rhwng 2022 a 2025:

  • Fe wnaeth nifer y darpar fyfyrwyr rhyngwladol sy'n gyfarwydd â Chymru fwy na dyblu, gan godi o 21% i 44%.
  • Cynyddodd diddordeb ymysg myfyrwyr o India o 18% i 32%.
  • Gwnaeth diddordeb gan fyfyrwyr o’r Unol Daleithiau fwy na dyblu, o 14% i 32%.
  • Dywedodd 76% o fyfyrwyr a oedd wedi gweld hysbysebion Astudio yng Nghymru eu bod yn fwy tebygol o ystyried astudio yng Nghymru.
  • Roedd darpar fyfyrwyr yn aml yn disgrifio Cymru fel lle 'hardd', 'croesawus' a 'chyffrous'.

Mae'r cynnydd hwn mewn ymwybyddiaeth a diddordeb wedi’i wireddu ar ffurf effaith yn y byd go iawn. Yn ôl data HESA, Cymru a welodd y twf uchaf yn nifer y myfyrwyr rhyngwladol yn y DU rhwng 2020/21 a 2023/24, gan berfformio'n well na gweddill y DU mewn marchnadoedd blaenoriaeth fel India ac UDA.

Mae'r llwyddiant hwn wedi'i gyflawni trwy fuddsoddiad strategol, wedi'i dargedu. Mae dyraniad diweddar gan Lywodraeth Cymru o £500,000 pellach i Gymru Fyd-eang ar gyfer blwyddyn bontio, yn adeiladu ar hanes profedig o sicrhau gwerth am arian, gan gefnogi prifysgolion a cholegau i hyrwyddo Cymru ar lwyfan y byd.

Fodd bynnag, yn dilyn newidiadau mewn rheolau Fisa a gyhoeddwyd gan Lywodraeth flaenorol y DU yn 2023, disgwylir i brifysgolion ledled y DU, gan gynnwys y rhai sydd yng Nghymru, weld dirywiad sylweddol mewn recriwtio rhyngwladol pan gyhoeddir ffigurau 2024/25.

Dywedodd Tom Woodward, Cyfarwyddwr Cynorthwyol Rhyngwladol Prifysgolion Cymru:

“Mae myfyrwyr rhyngwladol yn chwarae rhan hynod bwysig yn ein sefydliadau ac yn ein cymunedau, ac mae'n wych gweld mwy o ddarpar fyfyrwyr yn ystyried Cymru fel cyrchfan astudio bosibl. 

“Trwy frand Astudio yng Nghymru, mae Cymru Fyd-eang wedi codi proffil rhyngwladol prifysgolion Cymru, wedi cryfhau partneriaethau byd-eang, ac wedi helpu sefydliadau i gydweithio er mwyn arddangos y gorau o Gymru. Mae'r cynnydd mewn cydnabyddiaeth ryngwladol yn ganlyniad uniongyrchol i'r dull cydweithredol hwn.

“Mae gweithgaredd rhyngwladol ein prifysgolion o bwys hanfodol i berfformiad economaidd Cymru yn y dyfodol a’i chysylltiadau byd-eang. Gyda'r sector bellach yn wynebu anawsterau sylweddol oherwydd newidiadau polisi fisa ledled y DU a gyflwynwyd yn 2023, mae'n bwysicach nag erioed ein bod yn parhau i adeiladu ar y sylfeini a osodwyd gan Gymru Fyd-eang, ac yn cadarnhau enw da Cymru fel cyrchfan astudio gyffrous, groesawgar ac o ansawdd uchel.”